Մարթայի նոր, գունեղ ֆոտոշարքը

loading...
 

4 տարեկանից երգող, հանդիսատեսի աչքի առաջ մեծացած երգչուհի Մարտա Կիրակոսյանն առաջին անգամ հանդիսատեսին կներկայանա մենահամերգով։ Նախապատրաստական փուլում երգչուհին բավականին լարված է, ինչը փորձում է հաղթահարել նաև քաղցրի օգնությամբ։ Երգչուհին լուսանկարվել է Tert.am Life-ի գունեղ ու «քաղցր» ֆոտոշարքում և հետաքրքիր զրույց ունեցել մեզ հետ։

 

Մարտան խոստովանեց, որ շատ քաղցրակեր է: Երգչուհին չունի քաղցրի օգտագործման հստակ չափաբաժին,  երբեմն, սիրում է «բկլիկություն» անել:  «Եթե ես չափս անցնում եմ, ուրեմն, պետք է անցնեմ մինչև վերջ: Քաղցրի ճիշտ չափաբաժինը պահելու դեպքում կերածիցս նորմալ բան չեմ հասկանում:)»,- խոստովանեց երգչուհին, միաժամանակ շեշտեց, որ չի մոռանում  կազմվածքին հետևելու մասին: «Շատ եմ սիրում մարզվել, հիմնականում, հետևում եմ կազմվածքիս: Եթե ստաբիլ պարապում եմ, պարտադիր հետևում եմ  սննդակարգիս, բայց գալիս է ժամանակ, երբ ուզում ես ազատ սնվել,– ասաց երգչուհին, ով այս փուլում խոհանոցում ավելի հաճախ լինում է  ուտելու, ոչ թե ինչ–որ բան պատրաստելու համար,- Ցավոք, կյանքիս այս շրջանում, հաճախ չեմ լինում խոհանոցում, բայց, առհասարակ, շատ եմ սիրում իմ հորինած բաղադրատոմսերով հետաքրքիր բաներ պատրաստել»:

 

 

Շատերի համար քաղցրի օգտագործումը լարվածությունը ցրելու տարբերակներից մեկն է։ Մարտան ունի նաև իր տարբերակը. «Կողքիս ունեմ հարազատ մարդիկ, ովքեր կարողանում են  շատ արագ ինձ հանել լարված վիճակից»։

 

Մարտայի ֆոտոշարքը բավականին գունեղ է, թեև նրա ամենասիրելի գույնը սևն է։ «Կարծում եմ` սևն ամենաճիշտ գույնն է, թեև բոլոր գույներն էլ կարելի է գեղեցիկ համադրել, բայց տրամադրությանս հետ գույները երբեք չեմ կապում»,-ասաց նա ու հավելեց, որ իր տեսակն ու բնավորությունն ասոցացնում է սպիտակի հետ։

 

Մարտան միշտ առանձնանում է վառ և հետաքրքիր ոճերում  հանդես գալով  ոչ միայն բեմում, այլև առօրյայում: Ոճն ընդգծելու համար ամենակարևոր բաղադրիչը, նրա կարծիքով, ոչ ոքի չնմանակելն է: «Միշտ հագնվում եմ այնպես, ինչպես ինձ հարմար է և, իմ կարծիքով, գեղեցիկ: Եթե պիտի գնամ կարևոր տեղ կամ ինչ-որ առիթի, նախորդ օրն, անպայման, որոշում եմ` ինչ հագուստով եմ ներկայանալու, իսկ առօրյա հագուստի ընտրությունս կախված է տրամադրությունից»,- ասաց երգչուհին:

 

 

Այս փուլը Մարտայի համար շատ կարևոր է, քանի որ մենահամերգի նախապատրաստական աշխատանքը մեծ պատասխանատվություն է ենթադրում։ Մայիսի 26-ին` ժամը 19:00-ին, հարազատ Երգի պետական թատրոնում նա հանդիսատեսին կներկայացնի իր հին ու նոր երգերը: «Համերգի համար հատուկ խորագիր չեմ ընտրել։ Երգելու եմ այն երգերը, որոնք երգելիս հաճույք եմ ստանում: Կլինեն նաև զուգերգեր, դաշնամուրային դուետեր, cover-ներ և համարներ աշակերտներիս հետ»,- ասաց Մարտան:

 

Օրերս երգչուհին կարճ տեսանյութ էր հրապարակել, որում ինքն ու Սարոն երգում են «Հոգիս» ստեղծագործությունը։ «Ամեն ինչ շատ հանկարծակի ստացվեց։ Գնացել էի «ԿարենՍևակ» փրոդաքշնի ձայնագրման ստուդիա, Սարոն էլ էր այնտեղ, այդ պահին որոշեցինք ուղղակի երգել «Հոգիս» երգը։ Գուցե, համերգին էլ ներկայացնենք այն, բայց դա դեռ հստակ չէ։ Համագործակցություն, որպես այդպիսին, առայժմ չկա»,– նշեց նա։

 

Որպես կանոն` շատ  արտիստներ մենահամերգը համարում են ստեղծագործական կյանքի կարևորագույն փուլերից մեկը, որը հասունություն է պահանջում։ «Եթե իմ ուսուցիչը՝ Արթուր Գրիգորյանը, ինձ թույլ է տվել ունենալ փոքրիկ մենահամերգ, կարծում եմ՝ ունեմ այդ իրավունքը, սակայն հուզմունքս շատ մեծ է։  Պատասխանատվության զգացումը մեծ է, բայց վստահ եմ, բեմ դուրս գալուց 5 րոպե անց կմոռանամ ամեն ինչի մասին: Բացի այդ, համերգս ինձ այնքան հարազատ ու տան պես դարձած վայրում է, որ կարծում եմ` իմ գործն ավելի կհեշտանա»,- նշեց երգչուհին:

 

 

Մարտան պահանջարկի թելադրանքով չի առաջնորդվում, կարևորում է որակյալ երաժշտություն ներկայացնելը՝ անկախ նրանից, թե որ ոճում է ներկայանում: Որոշ ժամանակ առաջ նա հանդես էր գալիս նաև ակումբներում` բենդի նվագակցությամբ։ Երգչուհին անկեղծացավ, որ չի սիրում ակումբային գործունեությունը, սակայն շատ է սիրում հանդես գալ կենդանի նվագակցությամբ: «Ես ինձ համարում եմ այն արտիստներից, ովքեր կախում չունեն ոչնչից և ոչ ոքից: Ստիպված չեմ երգել կամ աշխատել մի տեղ, որտեղ ինձ տհաճ է կամ ինձ պիտի ասեն, թե ինչ երգեմ: Միշտ անում եմ այն, ինչ ուզում եմ, զգում եմ ու ճիշտ եմ համարում: Ես սիրում եմ լավ ու որակյալ երաժշտություն։ Դա միայն ջազը կամ սոուլը չէ։ Ցանկացած ոճում՝ սկսած ռաբիս-ֆոլկից կա և՛ անորակը, և՛ որակյալը։ Նույն ռաբիս երաժշտության մեջ կարելի է երգել գեղեցիկ ու ականջին շատ հաճելի»,– նկատեց նա։

 

Իր երաժշտական գործունեության ընթացքում Մարտան ունեցել է նաև հարաբերական դադարներ: Երգչուհին նշեց, որ երբեք շատ ակտիվ երգչուհի չի եղել։ Իր ակտիվությունը կախված է տվյալ փուլից և իր ցանկությունից: Նա վստահ է` պասիվ ու ակտիվ շրջափուլեր հաջորդիվ էլ կլինեն։

 

Երգչուհուց հետաքրքրվեցինք, թե գործունեության ակտիվ փուլերում լինո՞ւմ են  իրավիճակներ, երբ անձնական կյանքը խանգարում է իրեն։ «Ես իմ կյանքն այնպես եմ դասավորում, որ մեկը մյուսին հնարավորինս չխանգարի: Եթե կողակիցդ հասուն, կայացած, ինքնավստահ, քեզ սիրող ու հարգող մարդ է, որևէ խնդիր չի լինի, լինելու դեպքում էլ՝ շատ արագ կհարթվի»,– եզրափակեց երգչուհին։

 

 

loading...